21/12/06

Folla de proxección de ‘En la cama’


Nesta ligazón pode baixarse a folla de proxección do filme En la cama, que proxectamos hoxe no Cine Duplex:
http://rapidshare.com/files/8378490/cine-fsala06-6b.pdf.html

20/12/06

‘En la cama’

Esta é a nota de prensa que enviamos aos medios esta mañá:


TERMINA O CICLO «CINEMA ACTUAL»
COA PROXECCIÓN DE ‘EN LA CAMA’

Mañá, xoves 21 de decembro de 2006, no Cine Dúplex, ás 20.30 e 23 h, o Cineclube Padre Feijoo proxectará, en estrea en Ourense, o filme En la cama, dirixido en 2005 polo chileno Matías Bize. O prezo da entrada, simbólico, será de 2,50 euros.

A película conta a historia de Bruno e Daniela, que pouco despois de coñecérense nun café alugan un cuarto nun hotel barato para ter un encontro sexual e pasar a noite xuntos. Non saben nada do outro, nin sequera os seus respectivos nomes, e despois desa cita xamais se volverán ver. Tras o sexo, estes dous estraños perciben que entre ambos se creou certa química. Espontaneamente, os dous comezan a falar, abrindo as portas do seu pasado e a súa intimidade.

En la cama recibiu multitude de premios en festivais de todo o mundo (ademais de ser elixida como representante chilena para os Oscar e os Goya), pero entre eles destaca a Espiga de Ouro do Festival de Valladolid, en 2005.

O pequeno ciclo «Cinema actual» —que contou coa colaboración da Federación de Cineclubes de Galicia (apoiada pola Secretaría Xeral de Comunicación Audiovisual da Xunta de Galicia), a Casa da Xuventude (apoiada pola Vicepresidencia da Igualdade e do Benestar da Xunta de Galicia) e o grupo local de Amnistía Internacional en Ourense, ademais do propio Cine Dúplex— é outra das iniciativas de mínimos que o Cineclube Padre Feijoo vén desenvolvendo desde que quedou sen local estábel de proxección para o desenvolvemento das súas actividades, á espera dunha mellora desta situación.

19/12/06

Folla de proxección de ‘Tsotsi’


Mediante a seguinte ligazón accédese á versión pdf da folla de sala do filme que hoxe se proxecta dentro do ciclo Cinema Actual:
http://rapidshare.com/files/8151904/cine-fsala06-5b.pdf.html

12/12/06

Folla de proxección de ‘Camino a Guantánamo’

Nesta ligazón pode baixarse o arquivo pdf da folla de proxección do filme Camino a Guantánamo que encontrarán os asistentes ás proxeccións de hoxe no Cine Dúplex.

http://rapidshare.com/files/7200271/cine-fsala06-4b.pdf

05/12/06

Proxeccións e actividades en decembro 2006


Ciclo «Cinema actual»
Cine Dúplex

Prezo simbólico de entrada: 2,50 eur
Co apoio da Federación de Cineclubes de Galicia e a Secretaría Xeral de Comunicación Audiovisual da Xunta de Galicia

• Martes 12 de decembro de 2006 • Cine Dúplex • 20,30 e 23 h
Camino a Guantánamo

The Road to Guantanamo.
Reino Unido, 2006. Cor, 95 min. • Dirección: Michael Winterbottom e Mat Whitecross • Produción: Andrew Eaton, Melissa Parmenter, Lee Thomas, Michael Winterbottom (Revolution Films, FilmFour, Screen West Midlands) • Guión: Michael Winterbottom e Mat Whitecross • Fotografía: Marcel Zyskind • Montaxe: Michael Winterbottom e Mat Whitecross • Música: Harry Escott, Molly Nyman • Intérpretes: Arfan Usman (Asif), Farhad Harun (Ruhel), Riz Ahmed (Shafiq), Waqar Siddiqui (Monir), Ruhel Ahmed, Shafiq Rasul, Asif Iqbal • Data de estrea en España: 26 de maio de 2006. Versión orixinal con subtítulos en castelán.

Sitio oficial (inglés): http://www.roadtoguantanamomovie.com
Festival de Berlín 2006: Oso de Prata

A historia de catro amigos británicos que en setembro de 2001 viaxaron desde Tipton, nas Midlands inglesas, para asistir á voda dun deles e, de paso, gozar dunhas vacacións en Paquistán. Tardaron dous años e medio en volver á casa. A súa viaxe levounos desde Tipton até Karachi, Kandahar, Kabul e Kunduz, onde foron capturados pola Alianza do Norte (formada por distintas faccións de grupos armados unidos polo obxectivo de derrocar o réxime talibán) e despois pasaron a mans dos estadounidenses, que os conduciron a Kandahar. Desde alí, tres deles (Shafiq, de 23 anos; Asif e Ruhel, ambos de 19 anos) foron trasladados á base norteamericana de Guantánamo, en Cuba, onde permaneceron máis de dous anos prisioneiros, sometidos a incontábeis humillacións e torturas. O 5 de marzo de 2004 foron trasladados ao Reino Unido. En Londres, tras ser interrogados, foron postos en liberdade sen cargos.

En colaboración co grupo local de Amnistía Internacional en Ourense, co apoio da Casa da Xuventude de Ourense e da Dirección Xeral de Xuventude e Solidariedade

• actividade especial: Mércores 13 de decembro de 2006 • Casa da Xuventude • 20 h
«Pechemos Guantánamo»: testemuños directos
Charla coloquio con Ruhel Ahmed e Shafiq Rasul

Dous dos tres rapaces protagonistas dos feitos reais narrados polo filme Camino a Guantánamo
Ás 20.00 horas, no salón de actos da Casa da Xuventude. Entrada libre falarán da súa experiencia.
Organizado polo grupo local de Amnistía Internacional en Ourense, co apoio da Casa da Xuventude de Ourense e da Dirección Xeral de Xuventude e Solidariedade

• Martes 19 de decembro de 2006 • Cine Dúplex • 20,30 e 23 h
Tsotsi

Tsotsi. Reino Unido-Sudáfrica, 2005. Cor, 95 min. Dirección: Gavin Hood • Produción: Sam Bhembe, Joseph D’Morais, Basil Ford, Henrietta Fudakowski, Peter Fudakowski, Alan Howden, Robbie Little, Rupert Lywood, Doug Mankoff (The UK Film & TV Production Company, PLC Industrial Development Corporation of South Africa, The National Film & Video Foundation of SA) • Guión: Gavin Hood • Fotografía: Lance Gewer • Montaxe: Megan Gill • Música: Paul Hepker, Mark Kilian • Intérpretes: Presley Chweneyagae (Tsotsi), Terry Pheto (Miriam), Kenneth Nkosi (Aap), Mothusi Magano (Boston), Zenzo Ngqobe (Butcher), Zola (Fela) • Data de estrea en España: 24 de marzo de 2006 • Versión orixinal con subtítulos en castelán.

Sitio oficial (inglés): http://www.tsotsi.com

Oscar 2006 á Mellor Película de Fala non Inglesa • Festival de Toronto: Premio do Público, Festival de Edimburgo 2005: Premio do Público, Mellor Nova Película Británica • Festival de Denver 2005: Premio do Público • AFI Fest (Los Ánxeles): Premio do Público, Mención especial do xurado • Festival de Salónica: Premio aos Valores Humanos.

Nunha das barriadas ateigadas de miseria que rodean Johannesburgo, Tsotsi, un rapaz de 19 anos orfo desde moi pequeno, borrou calquera recordo da súa conciencia, incluíndo o seu nome real. Tsotsi significa simplemente «matón» o «gánster» na linguaxe de rúa do ghetto. As circunstancias levan a Tsotsi a roubarlle o coche a unha muller sen decatarse de que no asento traseiro descansa un bebé ao cal leva co automóbil. Facendo caso omiso ao seu instinto de supervivencia, que lle aconsella abandonar o pequeno, Tsotsi acaba levándoo e comeza a coidalo e alimentalo en segredo.

• Xoves 21 de decembro de 2006 • Cine Dúplex • 20,30 e 23 h
En la cama
En la cama. Chile-Alemaña, 2005. Cor, 85 min • Dirección: Matías Bize • Produción: Adrián Solar, Christoph Meyer-Wiel (Ceneca Producciones, CMW Films Company) • Guión: Julio Rojas • Fotografía: Cristián Castro e Gabriel Díaz • Montaxe: Paula Talloni • Música: Diego Fontecilla • Intérpretes: Blanca Lewin (Daniela), Gonzalo Valenzuela (Bruno) • Data de estrea en España: 14 de xullo de 2006 • Versión orixinal en castelán.

Sitio oficial: http://www.enlacama.cl

Seminici Valladolid 2005: Espiga de Ouro • Representante chilena aos Oscar • Festival da Habana: Mellor Guión • Festival de Viña del Mar: Mellor Actriz (Blanca Lewin) • Festival de Montevideo: Mellor Película Latinoamericana • Festroia: Premio Fipresci • Festival de Cine Latinoamericano de Toulousse: Premio do Público • Representante chilena aos Goya.

Unhas horas despois de coñecerse nun café, Bruno e Daniela alugan un cuarto nun hotel barato para ter un encontro sexual e pasar a noite xuntos. Non saben nada do outro, nin sequera os seus respectivos nomes, e despois desa cita xamais se volverán ver. Tras o sexo, estes dous estraños perciben que entre ambos se creou certa química. Espontaneamente, os dous comezan a falar, abrindo as portas do seu pasado e a súa intimidade. Nos seus relatos mestúranse lembranzas e soños, verdades e mentiras, desexos e medos, honestidade e traizón, amor e odio.

29/11/06

Novidades para decembro

Moita xente segue a preguntar cando volverá o Cineclube Padre Feijoo á actividade. De momento, as cousas seguen como estaban (este artigo, por exemplo, dá unha certa idea do que ocorre), e só podemos ir facendo actividade testemuñal mentres sigamos sen local de proxección. Iso si, podemos ir adiantando que en decembro teremos outro mini-ciclo de tres películas (cun extra moi interesante), do cal daremos información en breve, nesta mesma páxina.

12/05/06

Segue habendo público para outro tipo de cinema

Hoxe enviamos esta nota de prensa aos medios:

MÁIS DE 300 ESPECTADORES ASISTIRON
ÁS SESIÓNS DO CICLO ‘CINEMA E DEREITOS HUMANOS’

O II Ciclo Cinema e Dereitos Humanos, que decorreu nas últimas semanas no cine Dúplex organizado polo Cineclube Padre Feijoo e o Grupo Local de Amnistía Internacional en Ourense, demostrou que segue a existir público para o cinema alternativo na cidade. Como era habitual nas proxeccións de temporadas anteriores do Cineclube, vénse mantendo unha media dun centenar de espectadores por cada filme proxectado.
En concreto, o filme Madame Brouette tivo unha asistencia total de 67 espectadores; La pesadilla de Darwin, pola súa parte, chegou aos 116, e Paradise Now, aos 123, o que supón un total de 306 espectadores.
O ciclo puido ser levado a cabo grazas á axuda da Federación de Cineclubes de Galicia, da Casa da Xuventude de Ourense e da Vicerreitoría de Planificación e Desenvolvemento do Campus de Ourense, ademais do propio Cine Dúplex.

O futuro do Cineclube segue a ser incerto, mentres non se poña solución á necesidade dun local estábel para as proxeccións, algo que está nas mans das institucións ourensás. Hoxe por hoxe, o déficit de actividades cinematográficas na cidade é moi grande, e sitúa Ourense a ese respecto nos últimos postos entre as cidades galegas.

11/05/06

Folla de proxección de ‘Paradise Now’

Podes descargar aquí en formato pdf a folla de proxección que estará hoxe a disposición dos/as asistentes ás sesións de Paradise Now. Contén unha entrevista co director e información sobre accións de Amnistía Internacional relativas a Israel e os Territorios Ocupados.

10/05/06

Paradise Now


Esta é a nota de prensa enviada aos medios esta mañá:




FINAL DO CICLO «CINEMA E DEREITOS HUMANOS»
CO POLÉMICO FILME PALESTINO ‘PARADISE NOW’

Mañá, xoves 11 de maio de 2006, o ciclo Cinema e Dereitos Humanos organizado polo Grupo Local de Amnistía Internacional en Ourense e o Cineclube Padre Feijoo ofrecerá, en estrea en Ourense, o filme Paradise Now, dirixido polo palestino Hany Abu-Assad. A película, que foi galardoada co Globo de Ouro 2005 ao mellor filme de fala non inglesa, recibirá dous pases, ás 20.30 e ás 23.00 h, no Cine Dúplex (rúa Sáenz Díez s/n, Ourense). O prezo simbólico de entrada será de 2,50 euros.
O ciclo conta coa colaboración da Federación de Cineclubes de Galicia, a Casa da Xuventude de Ourense e a Vicerreitoría de Planificación do Campus de Ourense.

Paradise Now serve para ilustrar dentro do ciclo as problemáticas relacionadas cos dereitos humanos en zonas de conflito. Conta a historia de dous mozos palestinos, amigos desde a infancia, que son recrutados para levar a cabo un atentado suicida en Tel Aviv. Despois dunha última noite coas súas respectivas familias, das cales non lles está permitido despedirse, parten cara á fronteira con explosivos pegados ao corpo. Con todo, nada sae como estaba planeado e unha serie de imprevistos obríganlles a separarse.
Aínda que o filme en ningún momento xustifica a perda de vidas humanas, a súa nominación na categoría de mellor filme estranxeiro na última edición dos óscar causou moita polémica en Hollywood. O director, Hany Abu-Assad, comenta ao respecto: «Creo que todo isto xurdiu a partir da idea do filme, mais non do filme en si. É unha reacción automática. Só espero que a xente vexa a película antes de facer comentarios».
Con estas proxeccións, o Cineclube Padre Feijoo finaliza as súas actividades, até o momento en que algunha institución lle poida garantir a continuidade das proxeccións nunha sala da cidade.

04/05/06

Folla de proxección de ‘La pesadilla de Darwin’

Pódese descargar en formato pdf a folla de proxección que poderán ler os espectadores do filme esta tarde. Inclúe unha entrevista co director, Hubert Sauper, e información sobre a campaña Armas baixo Control de Amnistía Internacional.

03/05/06

La pesadilla de Darwin


Esta é a nota de prensa que se enviou aos medios esta mañá.



O CICLO DE CINEMA E DEREITOS HUMANOS CONTINÚA
COA PREMIADA E IMPACTANTE ‘LA PESADILLA DE DARWIN’

Mañá, xoves 4 de maio de 2006, o Ciclo Cinema e Dereitos Humanos organizado polo Grupo Local de Amnistía Internacional en Ourense e o Cineclube Padre Feijoo ofrecerá, en estrea en Ourense, o filme documental La pesadilla de Darwin (Darwin’s Nightmare), dirixido polo austríaco Hubert Sauper. A película, que foi nomeada na categoría de mellor documental na pasada edición dos Oscar, recibirá dous pases, ás 20.30 e ás 23.00 h, no Cine Dúplex (rúa Sáenz Díez s/n, Ourense). O prezo simbólico de entrada será de 2,50 euros.
O ciclo conta coa colaboración da Federación de Cineclubes de Galicia, a Casa da Xuventude de Ourense e a Vicerreitoría de Planificación do Campus de Ourense.

La pesadilla de Darwin fala do comercio da perca do Nilo, un peixe introducido artificialmente no lago Vitoria (entre Tanzania, Uganda e Kenya), que arrasou con todas as especies autóctonas deste xigantesco lago, e que hoxe é exportado por todo o mundo. Enormes avións de carga da antiga Unión Soviética chegan diariamente para recoller os últimos cargamentos de pesca e, a cambio, descargan a súa mercadoría: kalashnikovs e munición para as innumerábeis guerras que teñen lugar na parte central do continente.
O mostrado no filme serve de exemplo dos procesos de capitalismo salvaxe que se dan hoxe en todo o mundo. Di o director: «podería facer o mesmo tipo de película en Serra Leona, na cal en vez de peixe serían diamantes, ou en Honduras, en que serían bananas, ou en Libia, Nixeria ou Angola, en que sería petróleo».
Hubert Sauper conta como naceu a idea deste documental: «Fixen outro filme no Congo en 1997. E o único xeito de introducirnos na rexión era empregar os avións da ONU. Fíxenme amigo dos pilotos, e dixéronme: “Non creas que só traemos axuda humanitaria ao Congo”. Preguntei: “Que máis traedes?” “Calquera cousa que necesites para a guerra”. Imaxineime que pagaba a pena investir uns cantos anos da miña vida para facer unha película a partir disto».

26/04/06

Folla de proxección de 'Madame Brouette'

Nesta ligazón podes acceder á folla que poderán recoller os espectadores do filme Madame Brouette mañá, xoves 27 de abril. Nela encontrarás unha pequena entrevista co director da película, Moussa Sene Absa.

Madame Brouette


Esta é a nota de prensa enviada aos medios esta mañá:




‘MADAME BROUETTE’ DÁ COMEZO
AO CICLO CINEMA E DEREITOS HUMANOS


Mañá, xoves 27 de abril de 2006, comezará o II Ciclo Cinema e Dereitos Humanos, organizado polo Grupo Local de Amnistía Internacional en Ourense e mais o Cineclube Padre Feijoo, coa proxección en estrea do filme Madame Brouette, dirixido polo senegalés Moussa Sene Absa. A película, gañadora en 2003 do Oso de Prata á mellor música no Festival de Berlín, recibirá dous pases, ás 20.30 e ás 23.00 h, no Cine Dúplex (rúa Sáenz Díez, s/n, 32003 Ourense). O prezo simbólico de entrada serán 2,50 euros.

Madame Brouette, que dentro do ciclo serve para ilustrar os problemas relacionados cos dereitos da muller, conta a historia de Mati, unha muller loitadora e independente, que sobrevive grazas a un pequeno posto que instala no mercado. Un día, o seu amante sae da casa de Mati cribado a disparos e cae morto ao chan. No contorno todas as mulleres defenden a súa veciña. En canto aos homes, non están seguros de que semellante acto poida ser perdoado: que ocorrería se as súas esposas tivesen a mesma idea?
Trátase dunha estimulante mestura entre intriga policial e denuncia social: «Procurei combinar unha historia entretida cunha ollada á situación da muller africana», apunta o director, Moussa Sene Absa (Dakar, 1958), multifacético artista, pintor, escritor e músico. «En África existen unhas voces que non se escoitan nunca, que son as das mulleres, e que están cargadas de verdade e sensibilidade; nas súas mans está o futuro do mundo».
Ademais do premio en Berlín, a película foi galardoada no Festival de París e no Festival de Cine do Sáhara.
A proxección será en versión orixinal en francés, con subtítulos en castelán.

17/04/06

Xa está dispoñíbel o folleto do II Ciclo Cinema e Dereitos Humanos en formato pdf (en breve tamén en papel en diversos puntos da cidade de Ourense)

06/04/06


II CICLO CINEMA E DEREITOS HUMANOS
Xoves 27 de abril, 4 e 11 de maio de 2006
Cine Dúplex, 20.30 e 23 h
Organizado polo Cineclube Padre Feijoo e o Grupo Local de Amnistía Internacional en Ourense
Coa colaboración da Federación de Cineclubes de Galicia, a Casa da Xuventude de Ourense e a Vicerreitoría de Planificación e Desenvolvemento do Campus de Ourense da Universidade de Vigo

ESTREAS EN OURENSE
entrada: 2,50 euros (prezo simbólico)
Xoves 27 de abril: Madame Brouette
Cine Dúplex, 20.30 e 23 h
Xoves 4 de maio: La pesadilla de Darwin
Cine Dúplex, 20.30 e 23 h
Xoves 11 de maio: Paradise Now
Cine Dúplex, 20.30 e 23 h
Nun momento especialmente difícil para a actividade cinematográfica na nosa cidade, o grupo de Amnistía Internacional en Ourense e o Cineclube Padre Feijoo ofrecen esta oportunidade de gozar de cinema en pantalla grande e na súa versión orixinal.
Desde Senegal pasamos á rexión fronteiriza entre Uganda, Tanzania e Kenya, para chegarmos finalmente a Israel e os territorios ocupados, a través de películas inéditas nas salas cinematográficas ourensás. É un dos moitos percorridos que poderiamos facer polo mundo a través dun cinema comprometido, que non busca só entreter senón tamén ofrecer miradas críticas a diferentes realidades.
No mundo, por desgraza, conflitos e abusos contra os dereitos humanos están á orde do día. Non necesitamos viaxar para descubrir eses problemas, xa que moitos deles podemos encontralos mesmo nos nosos barrios, pero unha ollada ao que acontece noutros lugares debe servir tamén para tomar perspectiva e ver que os problemas das persoas en calquera parte do planeta nos atinxen a todos e a todas. Non é unha escusa para lamentarnos, senón o momento de decatarnos de que, desde a nosa posición, tamén temos formas de actuar para cambiar as cousas.
www.actuaconAmnistia.com
www.es.amnesty.org


os dereitos da muller
Xoves 27 de abril
Madame Brouette
Cine Dúplex, 20.30 e 23 h
L’extraordinaire destin de Madame Brouette (Senegal/Canadá/Francia, 2002). Cor, 104 min. • Dirección: Moussa Sene Absa • Produción: Badou Ba, Danielle Champoux, Rock Demers, Claude Gilaizeau, Moussa Sene Absa (MSA Productions, Les Productions de la Lanterne, Les Productions La Fête) • Guión: Moussa Sene Absa, Gilles Desjardins • Fotografía: Jean-Jacques Bouhon • Montaxe: Matthieu Roy-Décarie • Música: Mamadou Diabaté, Serge Fiori, Majoly • Intérpretes: Rokhaya Niang (Mati), Aboubacar Sadikh Bâ (Naago), Kadiatou Sy (Ndaxte), Ndeye Seneba Seck (Ndeye), Ousseynou Diop • Versión orixinal con subtítulos en castelán. Data de estrea en España: 21/1/2005
Sitio oficial en francés: http://www.ocean-films.com/madamebrouette
Oso de Prata á mellor música no Festival de Berlín 2003 • Premio especial do xurado no Festival de París 2003
Mati é unha muller loitadora e independente. Sobrevive grazas a un pequeno posto que instala no mercado, e o seu gran soño é abrir un restaurante co que poder vivir dignamente. Un día crúzase na súa vida un policía local do que se namora. Todo se desenvolve con normalidade até que un tráxico día Naago sae de casa de Mati cribado a disparos e cae morto ao chan. Que puido levala a realizar semellante acción? Foi realmente ela quen apertou o gatillo? No contorno todas as mulleres defenden a súa veciña. En canto aos homes, non están seguros de que semellante acto poida ser perdoado: que ocorrería se as súas esposas tivesen a mesma idea? Madame Brouette é un retrato crítico da situación social da muller africana actual.

o tráfico de armas – os dereitos sociais e económicos
Xoves 4 de maio
La pesadilla de Darwin
Cine Dúplex, 20.30 e 23 h
Darwin’s nightmare (Francia-Austria-Bélxica, 2004). Cor, 107 min. • Dirección e guión: Hubert Sauper • Produción: Edouard Mauriat, Antonin Svoboda, Martin Gschlacht, Barbara Albert, Hubert Toint, Hubert Sauper (Mille et Une Productions, Coop 99, Saga Film) • Fotografía: Hubert Sauper • Montaxe: Denise Vindevogel • Documental • Versión orixinal con subtítulos en castelán. Data de estrea en España: 1/7/2005.
Sitio oficial en castelán: http://www.sagreratv.com/darwinSitio oficial en inglés, francés e alemán: http://www.coop99.at/darwins-nightmare
Nomeada ao mellor documental nos oscar 2005 • Mellor documental 2005 nos premios da Academia do Cinema Europeo Premio Fipresci no Festival de Sydney 2005 • Premio ‘Label Europa Cinemas’ no Festival de Venecia 2004
Na década dos anos 60, no corazón de África, unha nova especie animal foi introducida no Lago Vitoria como un pequeno experimento científico. A perca do Nilo resultou ser un voraz depredador que arrasou con todas as especies autóctonas deste xigantesco lago. O novo peixe multiplicouse rapidamente, e hoxe en día os seus brancos filetes seguen sendo exportados ao redor do mundo. Enormes avións de carga da antiga Unión Soviética chegan diariamente para recoller os últimos cargamentos de pesca e, a cambio, descargan a súa mercadoría: Kalashnikovs e munición para as innumerábeis guerras que teñen lugar na parte central do continente. Esta explosiva industria multinacional de peixes e armas creou unha desoladora alianza globalizada ás beiras do lago tropical máis grande do mundo: un exército de pescadores locais, executivos financeiros internacionais, nenos sen casa, ministros africanos, comisarios da Unión Europea, prostitutas tanzanesas e pilotos rusos. A orixinalidade deste exemplar documental estriba na súa intelixencia á hora de relacionar elementos que, a priori, parecen pertencer a universos demasiado distintos para coexistir nun só planeta.

os dereitos humanos en zonas de conflito
Xoves 11 de maio
Paradise Now
Cine Dúplex, 20.30 e 23 h
Paradise Now (Palestina-Francia-Alemaña-Holanda-Israel, 2005). Cor, 90 min • Dirección: Hany Abu-Assad • Produción: Bero Beyer, Pasquale Scimeca (Augustus Film, Lama Productions Ltd., Razor Film Produktion GmbH, Lumen Films, Arte France Cinéma) • Guión: Hany Abu-Assad, Bero Beyer, Pierre Hodgson • Fotografía: Antoine Héberlé • Montaxe: Sander Vos • Música: Jina Sumedi • Intérpretes: Kais Nashef (Said), Ali Suliman (Khaled), Lubna Azabal (Suha), Amer Hlehel (Jamal), Hiam Abbass (nai de Said). Versión orixinal con subtítulos en castelán. Data de estrea en España: 30/9/2005.
Sitio oficial en castelán: http://www.golem.es/paradisenow
Sitio oficial en inglés:
http://wip.warnerbros.com/paradisenow
Nomeada ao oscar 2005 á mellor película de fala non inglesa • Berlín 2005: Premio Anxo Azul, Premio Amnistía Internacional • Mellor guión 2005 nos Premios da Academia do Cinema Europeo • Globo de Ouro 2005 á mellor película de fala non inglesa • Premio Independent Spirit 2005 á mellor película de fala non inglesa.
Khaled e Saïd son dous mozos palestinos, amigos desde a infancia, aos cales recrutan para levar a cabo un atentado suicida en Tel Aviv. Despois dunha última noite coas súas respectivas familias, das que non lles está permitido despedirse, parten cara á fronteira con explosivos pegados ao corpo. Con todo, nada sae como estaba planeado e unha serie de imprevistos obríganlles a separarse. Sos, non lles queda máis remedio que enfrontarse ao seu destino e ás súas conviccións... Esta película, rodada integramente en Nablus, propón unha interesante visión da vida cotiá de persoas en circunstancias desesperadas. Explora as lexítimas razóns da resistencia á ocupación sen xustificar en ningún momento a perda de vidas humanas.