27/11/07

‘Tideland’


Esta é a nota de prensa que enviamos hoxe aos medios:

MAÑÁ CONCLÚE O CICLO DE ESTREAS EN VERSIÓN ORIXINAL
COA PROXECCIÓN DE ‘TIDELAND’

Mañá mércores 28 de novembro de 2007, o Cineclube Padre Feijoo e Cinebox Ourense darán fin ao ciclo «Estreas en versión orixinal: Cinema europeo» co filme Tideland (2005), de Terry Gilliam. Os pases serán ás 20.30 e 23.00 horas, nas salas do Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).

Para este ciclo «Cinema europeo» cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo. Despois do éxito que representaron os dous primeiros filmes do ciclo, e o que se estima terán as proxeccións desta semana, estase xa a preparar un novo ciclo cinematográfico para comezos de 2008.

Tideland conta unha historia protagonizada por Jeliza-Rose, unha nena cuxos seus pais son drogadictos. Cando morre a súa nai, a nena comeza unha estraña viaxe co seu pai, un músico de rock pasado de moda. Jeliza-Rose escapa da inmensa soidade da súa nova casa e entra nun mundo de fantasía que existe na súa imaxinación. Neste mundo, os vagalumes teñen nomes, os homes de barro despertan ao anoitecer e os esquíos falan. Os seus confidentes son as cabezas de catro bonecas, separadas dos seus corpos hai moito tempo, até que coñece a Dickens, un rapaz diminuído psíquico coa mente dun neno de dez anos.

Optimista e asemade surrealista, graciosa e a un tempo tenebrosa, Tideland é unha homenaxe ao poder da imaxinación infantil que recibiu o Premio Fipresci (o premio da crítica internacional) no Festival de San Sebastián 2005. Terry Gilliam, membro orixinal dos míticos Monty Python, é considerado un dos directores máis persoais da escena actual; é autor, entre outras, de Brazil, El rey pescador, Doce monos e Miedo y asco en las Vegas (proxectada no Cineclube en 1999).

13/11/07

‘Nuevo mundo (Golden Door)’

Esta é a nota que enviamos hoxe aos medios:

CONTINÚA O CICLO DE ESTREAS EN VERSIÓN ORIXINAL
CON ‘NUEVO MUNDO’

Mañá mércores 14 de novembro de 2007, o Cineclube Padre Feijoo e Cinebox Ourense proseguen co ciclo «Estreas en versión orixinal: Cinema europeo» co filme Nuevo mundo (Golden Door) (Nuovomondo, 2006), do italiano Emanuele Crialese. Os pases serán ás 20.30 e 23.00 horas, nas salas do Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
Até agora, pode cualificarse de éxito a marcha do ciclo, xa que a primeira das películas contou cunha magnífica acollida do público, até o punto de que algunhas persoas non puideron conseguir entrada para a primeira das sesións.
Para este ciclo «Cinema europeo» cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.

Nuevo mundo sitúanos inicialmente en Sicilia, a principios do século XX. A familia Mancuso abandona o seu país natal para navegar cara a unha terra soñada e descoñecida, o Novo Mundo. Lucy, unha rapaza inglesa cun pasado misterioso, únese a eles neste longo periplo. Despois da longa viaxe en barco, terán que pasar as probas para entrar nos EE UU.
O filme supón unha visión moi achegada ao que debeu de ser a realidade da emigración europea naqueles días, o que permite facerse unha idea tamén de como era a emigración transatlántica galega na altura. Nuevo mundo recibiu unha chea de premios no Festival de Venecia 2007, entre os que destacan o León de Prata e o Premio Unicef.
Protagonizada por Vincenzo Amato e Charlotte Gainsbourg, é a terceira longametraxe do seu director, o italiano de familia siciliana Emanuele Crialese (Roma, 1965); Crialese estudou realización na Universidade de Nova York, e rodou a súa primeira longametraxe en 1997, Once we were strangers, seleccionada polo Festival de Sundance. En 2002 gañou na Semana da Crítica de Cannes o Gran Premio da Crítica e o Premio do Público por Respiro, estreada no seu momento polo Cineclube Padre Feijoo en Ourense.

06/11/07

‘2 días en París’


Esta é a nota de prensa que enviamos hoxe aos medios:


‘2 DÍAS EN PARÍS’ ABRE O CICLO DE ESTREAS EN VERSIÓN ORIXINAL

Mañá mércores 7 de novembro de 2007, o Cineclube Padre Feijoo e Cinebox Ourense darán comezo ao ciclo «Estreas en versión orixinal: Cinema europeo» co filme 2 días en París (Deux jours à Paris, 2007), da francesa Julie Delpy. Os pases, ás 20.30 e 23.00 horas, terán lugar no Cinebox Ourense, no Centro Comercial Ponte Vella; as entradas serán de 4,00 euros (3,00 euros no caso de estudantes con carné universitario).
Para este ciclo cóntase coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.

2 días en París
preséntanos unha parella, formada por Marion, francesa, e Jack, estadounidense, residentes en Nova York. Acaban de pasar unhas «vacacións románticas» en Venecia, que, na realidade, foron unha viaxe inzada de malentendidos e discusións. Antes de volveren a EE UU, pasan dous días en París e instálanse no minúsculo apartamento de Marion, no mesmo edificio que o piso de seus pais, aos que Jack aínda non coñece. Para Jack, os pais dela, os seus anteriores mozos e os costumes franceses son un auténtico choque cultural, até o punto de chegaren a pór en perigo a relación.
Sobre a película, que foi presentada na prestixiosa sección Panorama do Festival de Berlín 2007, a prensa francesa dixo que mestura «a frescura do primeiro Jarmusch cun toque de Woody Allen» (Nelly Kaprièlian, Les Inrockuptibles), e que é «divertida, lixeira e chea de vitalidade» (Anthony Bobeau, Le Film Français). Dominique Borde escribiu no xornal Le Figaro: «Co seu lado improvisado e unha alegre obsesión polo sexo, é unha película rápida, brillante, fácil e executada con mestría. Picante, horripilante, sedutora, neurótica, obscena e púdica, Julie Delpy conta a historia de calquera parella falando da súa».
É a segunda longametraxe de Julie Delpy (París, 1969) como directora. Delpy comezou a súa carreira como actriz aos 14 anos no filme Detective, de Jean-Luc Godard. Despois de traballar con realizadores europeos como Bertrand Tavernier, Carlos Saura, Volker Schlondorff e Krzysztof Kieslowski, marchou a EE UU a estudar escrita de guión e realización. Desde entón, colaborou regularmente con directores independentes como Richard Linklater, Alan Rudolph, Jim Jarmusch e Lasse Hallström.

30/10/07


O CINECLUBE PADRE FEIJOO E CINEBOX OURENSE PRESENTAN
UN CICLO DE ESTREAS EN VERSIÓN ORIXINAL

Os próximos mércores 7, 14 e 28 de novembro de 2007, o Cineclube Padre Feijoo e Cinebox Ourense proxectarán o primeiro ciclo «Estreas en versión orixinal», co subtítulo neste caso de «Cinema europeo». O interese dos organizadores é que os ciclos poidan desenvolverse periodicamente, para manter unha continuidade na programación cultural cinematográfica da cidade, aínda que dita periodicidade aínda está por fixar.
Para este primeiro ciclo contouse coa colaboración da Federación de Cineclubes de Galicia, apoiada pola Dirección Xeral de Comunicación Audiovisual da Xunta de Galicia, e mais da Vicerreitoría do Campus de Ourense da Universidade de Vigo.
O ciclo «Estreas en versión orixinal: Cinema europeo» constará dos filmes 2 días en París (Deux jours à Paris, 2007), da francesa Julie Delpy, que se proxectará o próximo mércores 7 de novembro; Nuevo mundo (Nuovomondo, 2006), do italiano Emanuele Crialese, o mércores 14 de novembro; e Tideland (2005), do británico —aínda que orixinario dos EE UU— Terry Gilliam, o mércores 28 de novembro. Todas elas serán proxectadas nos Cinebox Ourense, en dous pases, ás 20.30 e ás 23.00 h. O prezo das entradas será de 4 euros, e os estudantes con carné universitario terán un prezo especial de 3 euros.
Para a escolla dos títulos buscáronse filmes inéditos na cidade, distribuídos no estado nos últimos meses —Tideland, malia ser de 2005, non foi estreada en España até xuño deste ano—, con presenza forte en festivais internacionais (neste caso, Berlín, Venecia e San Sebastián, respectivamente). A aposta pola versión orixinal subtitulada responde á intención de mostrar os filmes tal e como foron concibidos, e supón unha magnífica oportunidade de gozar coa sonoridade propia de cada lingua e da actuación real dos actores. A contrastada calidade de proxección dos cines Cinebox Ourense fará que a experiencia de visionar estes filmes sexa a mellor das posíbeis hoxe por hoxe.
O Cineclube Padre Feijoo, sen local fixo de proxección desde que problemas técnicos obrigaron a deixar a sala da Biblioteca Pública en maio de 2004, vén organizando pequenos ciclos coa axuda das salas comerciais de proxección e o apoio de diversas institucións. Une os seus esforzos así con Cinebox Ourense, o único cinema comercial en activo actualmente na nosa cidade, que demostra o seu compromiso de actividade cultural inherente á exhibición cinematográfica.


• Mércores 7 de novembro de 2007 | Cinebox Ourense, 20.30 e 23.00 h
2 días en París
Deux jours à Paris.
Francia/Alemaña, 2007. Cor, 94 min. Dirección e guión: Julie Delpy • Produción: Christophe Mazodier, Julie Delpy, Thierry Potok (Tempête Sous un Crâne, Back Up Media, Polaris Films, Rézo Films) • Fotografía: Lubomir Bakchev • Montaxe: Julie Delpy • Música: Julie Delpy • Intérpretes: Adam Goldberg (Jack), Julie Delpy (Marion), Daniel Brühl (Lukas), Marie Pillet (Anna), Albert Delpy (Jeannot), Alexia Landeau (Rose), Adan Jodorowsky (Mathieu), Alex Nahon (Manu), Vanessa Seward (Vanessa) • Estrea en Francia: 11/7/2007 • Estrea en España: 10/8/2007 • Versión orixinal en inglés e francés con subtítulos en castelán.

Festival de Berlín 2007: sección Panorama • Festival International du Film d’Amour de Mons: Premio ‘Coup de Cœur’
Web oficial (castelán): http://www.golem.es/dosdiasenparis
Web oficial (inglés): http://www.2daysinparisthefilm.com

Marion e Jack viven en Nova York. Marion é francesa; Jack, estadounidense. Acaban de pasar unhas «vacacións románticas» en Venecia que, na realidade, foron unha viaxe inzada de malentendidos e discusións. Antes de volver a EE UU, pasan dous días en París, entre outras cousas para recuperar o gato que Marion deixou ao coidado de seus pais. Instálanse no minúsculo apartamento de Marion, no mesmo edificio que o piso de seus pais, aos que Jack aínda non coñece. Para Jack, os pais dela, os seus anteriores mozos e os costumes franceses son un auténtico choque cultural, até o punto de pór en perigo a relación.

• Mércores 14 de novembro de 2007 | Cinebox Ourense, 20.30 e 23.00 h
Nuevo mundo (Golden Door)
Nuovomondo. Italia/Francia, 2006. Cor, 118 min.• Dirección e guión: Emanuele Crialese • Produción: Alexandre Mallet-Guy, Fabrizio Mosca, Emanuele Crialese (Rai Cinemafiction, Respiro, Memento Films Production, Arte France Cinéma, Titti Film) • Fotografía: Agnès Godard • Montaxe: Maryline Monthieux • Música: Antonio Castrignanò • Intérpretes: Charlotte Gainsbourg (Lucy), Vincenzo Amato (Salvatore), Aurora Quattrocchi (Donna Fortunata), Francesco Casisa (Angelo), Filippo Pucillo (Pietro), Federica de Cola (Rita), Vincet Schiavelli (don Luigi), Isabella Ragonese (Rosa), Massimo Laguardia (Mangiapane), Filippo Luna (don Ercole), Andrea Prodan (Del Fiore) • Estrea en Italia: 22/7/2006 • Estrea en España: 15/6/2007 • Versión orixinal en italiano con subtítulos en castelán.

Festival de Venecia 2006: León de Prata, Premio ‘CinemAwenire’, Premio Signis, Premio Unicef, Premio Fedic, Premio Pasinetti • Premios David di Donatello 2007: Mellor Vestiario, Mellor Deseño de Produción, Mellores Efectos Visuais.
Web oficial (castelán): http://www.golem.es/nuevomundo
Web oficial (inglés): http://www.goldendoor-movie.com

Sicilia, principios do século XX. A familia Mancuso abandona o seu país natal para navegar cara a unha terra soñada e descoñecida, o Novo Mundo. Lucy, unha rapaza inglesa cun pasado misterioso, únese a eles neste longo periplo. Mais non todos gozarán do privilexio de cruzar as portas do paraíso...

• Mércores 28 de novembro de 2007 | Cinebox Ourense, 20.30 e 23.00 h
Tideland
Tideland. Reino Unido/Canadá, 2005. Cor, 122 min. Dirección: Terry Gilliam • Produción: Jeremy Thomas, Gabriella Martinelli (Prescience Film Fund, Capri Films, Recorded Picture Company) • Guión: Tony Grisoni e Terry Gilliam, baseado na novela de Mitch Cullin • Fotografía: Nicola Pecorini • Montaxe: Lesley Walker • Música: Mychael Danna e Jeff Danna • Intérpretes: Jodelle Ferland (Jeliza-Rose), Jeff Bridges (Noah), Janet McTeer (Dell), Brendan Fletcher (Dickens), Jennifer Tilly (Gunhilda), Dylan Taylor (Patrick), Wendy Anderson (muller), Sally Crooks (nai de Dell) • Estrea no Reino Unido: 11/8/2006 • Estrea en España: 8/6/2007 • Versión orixinal en inglés con subtítulos en castelán.

Festival de San Sebastián 2005: premio Fipresci
Web oficial (castelán): http://www.notrofilms.com/tideland
Web oficial (inglés): http://www.tidelandthemovie.com

Jeliza-Rose é unha nena nunha situación moi especial: os seus pais son drogadictos. Cando morre a súa nai, a nena comeza unha estraña viaxe co seu pai, un músico de rock pasado de moda. Jeliza-Rose escapa da inmensa soidade da súa nova casa e entra nun mundo de fantasía que existe na súa imaxinación. Neste mundo, os vagalumes teñen nomes, os homes de barro despertan ao anoitecer e os esquíos falan. Os seus confidentes son as cabezas de catro bonecas, separadas dos seus corpos hai moito tempo, até que coñece a Dickens, un rapaz diminuído psíquico coa mente dun neno de dez anos.

09/05/07

‘The Host’

Esta é a nota de prensa que enviamos hoxe aos medios

‘THE HOST’
PON O PUNTO FINAL AO CICLO «NOVAS OLLADAS»

Mañá, 10 de maio de 2007, o Cineclube Padre FeijooCine Dúplex proxecta, no (rúa Sáenz Díez s/n), o filme surcoreano The Host (Gwoemul), dirixido en 2006 por Joon-ho Bong. A entrada terá un prezo simbólico de 2,50 euros, reducida portando o carné universitario a 1,50 euros. A proxección, ás 20.30 e 23 h,«Novas Olladas», dedicado ás revisións que se están a dar a diversos xéneros como o thriller e o fantástico; un ciclo para o que se conta co apoio da Federación de Cineclubes de Galicia, a Dirección Xeral de Comunicación Audiovisual, a Vicerreitoría do Campus de Ourense e a Casa da Xuventude ourensá. será en versión orixinal con subtítulos en castelán. Finaliza así o ciclo
The Host narra a aparición dunha monstruosa criatura mutante que devora todo aquel que se cruza no seu camiño. O dono dun quiosco contemplará horrorizado como a besta rapta a súa filla e a leva ao seu agocho. Mentres o exército fracasa unha e outra vez no seu empeño por destruír o monstro, aquel homiño anónimo armarase de valor, e, coa axuda da súa familia, tentará recuperar a súa filla das garras daquela abominación.
Recorrendo aos esquemas das películas de monstros,
Joon-ho Bong —o realizador de Memories of Murder, revelación na edición de 2004 do Festival de San Sebastián— constrúe un filme persoal á vez que entretido. Un dos filmes máis agardados no Festival de Cannes 2006, onde foi presentado na prestixiosa Quincena dos Realizadores, tamén foi unha das películas triunfadoras do Festival de Sitges, onde obtivo o premio aos mellores efectos especiais e o premio ao mellor filme na categoría «Orient Express».
Estas son só algunhas das frases que ten publicado a crítica española sobre o filme:
«The Host supón un punto e á parte no cinema de monstros» (El Mundo); «Algo moi grande tería que irromper para desbancar The Host como mellor monstro do século XXI» (Cinemanía); «Joon-ho Bong consegue un dos filmes máis perfectos dos últimos anos» (Guía del Ocio); «Un filme que non só demostra o potencial do cinema surcoreano actual, senón que revitaliza o xénero fantástico» (Imágenes de Actualidad); «Entre Tiburón e Pequeña Miss Sunshine, The Host pon os pelos de punta» (EP3, El País); «Un sentido do espectáculo fantástico realmente apabullante» (Exit, El Periódico).

02/05/07

‘Brick’


Nota de prensa enviada hoxe aos medios


‘BRICK’ CONTINÚA O CICLO «NOVAS OLLADAS»

Mañá, 3 de maio de 2007, o Cineclube Padre Feijoo proxecta, no Cine Dúplex (rúa Sáenz Díez s/n), o filme norteamericano Brick, dirixido en 2006 por Rian Johnson. A entrada terá un prezo simbólico de 2,50 euros, reducida portando o carné universitario a 1,50 euros. A proxección será en versión orixinal en inglés con subtítulos en castelán. Prosegue así o ciclo «Novas Olladas», dedicado ás revisións que se están a dar a diversos xéneros como o thriller e o fantástico, para o que se conta co apoio da Federación de Cineclubes de Galicia, a Dirección Xeral de Comunicación Audiovisual, a Vicerreitoría do Campus de Ourense e a Casa da Xuventude ourensá.

Brick conta a historia de Brendan, un estudante de instituto, intelixente e activo, que, non obstante, prefire manterse á marxe de todo até que a súa ex-moza, Emily, volve inesperadamente á súa vida, semella que con problemas, para desaparecer pouco despois sen deixar rastro. Brendan embarcarase nunha perigosa busca, na cal só contará coa axuda do seu único amigo.

Gañador do Premio Especial do Xurado no Festival de Sundance, galardoado ademais co Premio Mellor Novo Director no Festival de Sitges e seleccionado para a sección oficial do Festival de Venecia, Brick, primeira longametraxe de Rian Johnson, é un dos filmes máis sorprendentes do último cinema americano, e supón unha actualización memorábel do «xénero negro». Philip French, en The Guardian, cualificaba esta fita como «un exercicio virtuoso que é asemade unha cariñosa homenaxe, un exercicio de fantasía romántica e un comentario indirecto sobre a vida adolescente».


25/04/07

‘El Maligno’

Esta é a nota de prensa que enviamos hoxe aos medios:

COMEZA O CICLO «NOVAS OLLADAS»
CO FILME PORTUGUÉS ‘EL MALIGNO’

Mañá, 26 de abril de 2007, o Cineclube Padre Feijoo proxecta, no Cine Dúplex (rúa Sáenz Díez s/n), o filme portugués El Maligno (Coisa Ruim), di rixida en 2006 por Tiago Guedes e Frederico Serra. A entrada terá un prezo simbólico de 2,50 euros, reducida portando o carné universitario a 1,50 euros. A proxección será en versión orixinal en portugués con subtítulos en castelán. Con estas proxeccións comeza un novo ciclo do Cineclube, dedicado ás revisións que se están a dar a diversos xéneros como o thriller e o fantástico, a través de títulos destacados. O ciclo conta co apoio da Federación de Cineclubes de Galicia, a Dirección Xeral de Comunicación Audiovisual, a Vicerreitoría do Campus de Ourense e a Casa da Xuventude ourensá.
El Maligno conta como unha familia de Lisboa herda unha casa nunha pequena e afastada aldea do interior de Portugal. A xente di que coa casa tamén herdaron unha maldición. As crenzas e supersticións dos habitantes da aldea comezan a preocupar os pais desta familia mentres os fillos teñen visións das tres nenas que foran asasinadas polo antepasado que era dono daquela mansión.
A película participou nos prestixiosos festivais Fantasporto (onde serviu de filme de apertura) e Sitges.
Producida polo gran Paulo Branco —ligado a títulos de directores como Manoel de Oliveira, Wim Wenders, Alain Tanner, Raoul Ruiz ou Paul Auster—,
El Maligno (Coisa Ruim) foi un dos maiores éxitos do ano 2006 en Portugal. A pesar de ser unha fita próxima ao cinema de terror, «non pretende dar sustos, só abrir os ollos ao medo».
O guión está inspirado nos varios mitos e lendas dun Portugal profundo que, aínda hoxe, cohabita con cultos relixiosos de orixe cristiá e pagá. O suspense do filme vive sobre todo daquilo que non é contado explicitamente senón polas pequenas alusións que nos levan a tirar determinadas conclusións.
Con influencias directas de Night Shyamalan (El sexto sentido, El bosque) e Amenábar (Los otros), o filme ten, non obstante, un estilo propio, unha persoal forma de facer cinema que xa se deixaba ver nas curtametraxes que dirixiran conxuntamente os mesmos realizadores anteriormente.

18/04/07

Ciclo «Novas Olladas»

O Cineclube presenta un novo miniciclo para as tres próximas semanas. Este é e programa.

Ciclo «Novas olladas: do ‘thriller’ ao fantástico. Xéneros revisados»

26 de abril 2007 • Cine Dúplex, 20.30 e 23 h:
El maligno (Coisa Ruim) Tiago Guedes e Frederico Serra (Portugal)

3 de maio 2007 • Cine Dúplex, 20.30 e 23 h:
Brick • Rian Johnson (EE UU)

9 de maio 2007 • Cine Dúplex, 20.30 e 23 h:
The Host (Gwoemul) • Joon-ho Bong (Corea do Sur)

Coa colaboración de: Federación de Cineclubes de Galicia • Secretaría Xeral de Comunicación/Dirección Xeral de Comunicación Audiovisual • Universidade de Vigo/Vicerreitoría do Campus de Ourense • Casa da Xuventude de Ourense • Cine Dúplex
Todas as proxeccións son en versión orixinal subtitulada
Entrada (prezo simbólico): 2,50 euros. Con carné universitario ou da Casa da Xuventude de Ourense: 1,50 euros.


EL MALIGNO
Coisa Ruim. Portugal, 2006. Cor, 97 min • Dirección: Tiago Guedes e Frederico Serra • Produción: Paulo Branco (Madragoa Filmes) • Guión: Rodrigo Guedes de Carvalho • Fotografía: Victor Estévão • Montaxe: Pedro Ribeiro • Música: Jorge C. • Intérpretes: Adriano Luz, Manuela Couto, Sara Carinhas, José Afonso Pimentel • Versión orixinal con subtítulos en castelán. Non estreada comercialmente en España.

Fantasporto 2006: Filme de inauguración • Festival de Sitges 2006: Sección Oficial a Competición • Montreal Fantasia Film Festival • Germany Fantasy Film Festival • Cinenygma Film Festival • Korea Pusan Film Festival 2006.

Unha familia herda unha casa nunha pequena e afastada aldea. A xente di que coa casa tamén herdaron unha maldición. Producida polo gran Paulo Branco, foi un dos maiores éxitos do ano 2006 en Portugal. Un filme que non pretende dar sustos, só abrir os ollos ao medo.


BRICK
Brick. EE UU, 2006. Cor, 110 min • Guión e dirección: Rian Johnson • Produción: Ram Bergman, Mark G. Mathis (Bergman Lustig Productions) • Dirección de fotografía: Steve Yedlin • Montaxe: Rian Johnson • Música: Nathan Johnson • Intérpretes: Joseph Gordon-Levitt (Brendan), Nora Zehetner (Laura), Lukas Haas (The Pin), Noah Fleiss (Tugger), Matt O’Leary (The Brain), Emilie de Ravin (Emily), Noah Segan (Dode), Meagan Good (Kara) • Versión orixinal con subtítulos en castelán. Estrea en España: 1/12/2006

http://www.brickmovie.net

Festival de Sundance: Premio Especial do Xurado • Festival de Sitges: Premio Mellor Novo Director • Festival de Venecia: selección oficial

Brendan, un estudante de instituto, é un rapaz de aguda intelixencia que non teme apoiar as súas palabras con accións se a situación o require. Non obstante, prefire manterse á marxe de todo até que a súa ex-moza, Emily volve inesperadamente á súa vida, ao parecer con problemas, para desaparecer pouco despois sen deixar rastro. Brendan embarcarase nunha perigosa busca, na cal só contará coa axuda do seu único amigo. ‘Brick’ é un dos filmes máis sorprendentes do último cinema americano.


THE HOST
Gwoemul. Corea do Sur, 2006. Cor, 119 min • Director: Joon-ho Bong • Produción: Yong-bae Choi (Chungeorahm Film, Showbox/Mediaplex) • Guión: Joon-ho Bong, Won-jun Ha • Fotografía: Hyung-ku Kim • Montaxe: Seon Min Kim • Música: Byung-woo Lee • Intérpretes: Kang-ho Song, Hie-bong Byeon, Hae-il Park, Du-na Bae • Versión orixinal con subtítulos en castelán. Estrea en España: 2/3/2007

http://www.notrofilms.com/webthehost
http://www.hostmovie.com

Quincena dos Realizadores do Festival de Cannes 2006 • Festival de Sitges 2006: Sección Oficial a Competición; premio aos mellores efectos especiais; premio ao mellor filme na categoría Orient Express • Korean Film Awards: seis premios • Asian Film Awards: catro premios.


Os habitantes de Seúl observan sorprendidos un estraño obxecto pendurado dunha ponte sobre o río Han. Na realidade trátase dunha monstruosa criatura mutante que ao acordar devora todo aquel que se cruza no seu camiño. O dono dun quiosco á beira do río contemplará horrorizado como a besta rapta a súa filla e a leva ao seu agocho. Mentres o exército fracasa unha e outra vez no seu empeño por destruír o monstro, aquel homiño anónimo armarase de valor, e, coa axuda da súa familia, tentará recuperar a súa filla das garras daquela abominación. Un dos filmes máis agardados en Cannes 2006; é a última película do realizador de Memories of Murder, revelación na edición de 2004 do Festival de San Sebastián.

17/04/07

‘China Blue’, documental con Amarante

O CINECLUBE PADRE FEIJOO PROXECTA,
EN COLABORACIÓN CON AMARANTE
,
O FILME DOCUMENTAL ‘CHINA BLUE’

Mañá, mércores 18 de abril de 2007, excepcionalmente no Salón de actos da Biblioteca Pública (rúa Concello 11), o Cineclube Padre Feijoo proxectará, nunha única sesión ás 20.30 h, o filme documental estadounidense China Blue, dirixido en 2005 por Micha X. Peled e aínda inédito comercialmente no Estado. Esta proxección faise en colaboración con Amarante, ONG galega para o desenvolvemento (www.amaranteong.org), dentro da Campaña Roupa Limpa. A entrada será gratuíta, e na propia sala poderá visitarse ademais unha pequena exposición sobre o tema, «Os fios soltos da moda», que reflicte a situación da produción globalizada do téxtil e os seus efectos negativos sobre os traballadores/as, principalmente do Terceiro Mundo.

China Blue lévanos ao interior dunha fábrica de pantalóns vaqueiros, onde Jasmine e outras amigas tratan de sobrevivir ás duras condicións laborais. Cando o dono da fábrica chega a un acordo co seu cliente occidental que forza as súas traballadoras adolescentes a traballar día e noite, faise inevitábel a confrontación. Rodado clandestinamente na China, en condicións moi difíciles, este filme é un informe profundo sobre o que tanto China como as compañías internacionais de roupa non queren que vexamos: como se fan en realidade as prendas que mercamos.

A película levou, entre outros galardóns, o Premio Amnistía Internacional no Festival Internacional de Documentais de Amsterdam (IDFA).

O director, Micha X. Peled, realizou xa diferentes documentais relacionados coa globalización e os conflitos internacionais; ademais de varias curtametraxes, os seus dous filmes anteriores foron You, Me, Jerusalem (con Michael Khleifi, 1995) e Store Wars: When Wal-Mart Comes to Town (2001).

China Blue. EE UU, 2005. Cor, 86 min • Guión e dirección: Micha X. Peled • Produción: Micha X. Peled (Teddy Bear Films) • Dirección de fotografía: Micha X. Peled • Montaxe: Manuel Tsingaris • Música: Miriam Cutler • Documental • Versión orixinal subtitulada en castelán. Festival IDFA Amsterdam: Premio Amnistía Internacional • Festival de Toronto: sección oficial • Festival de Vancouver: sección oficial.